追憶似水年華

從親戚得知，原來媽咪青春時期曾得過大病，大病幾乎改變了一生，頭腦再不靈活，性格大變，未病前媽咪可以話惡過阿婆，病後變得溫馴不少．我明白阿媽唔講有佢原因，但我終於明白老豆點解一向都咁就得阿媽，從來一家人都睇阿媽意願，唔想去就唔會去，亦知道老豆擺下幾多心機精神係呢頭家．
轉差個日，我見阿媽捉住老豆隻手，第一次非常感到阿媽係好唔捨得老豆，數十載感情就此一刻可見，我唔識形容自己感覺，就好似走過時光隧道看過老豆阿媽溫馨日子，一位見證人，追憶似水年華．

希望與接受

要準備既東西已經做了，確實要些少時間接受，現在心裡已經有最壞打算．
唯一做到就是真心昐望奇蹟出現，看似矛盾的心態，掙扎希望與絕望界線，聽過姨丈與及朋友一番說話，看化人生或者就是最大安慰，曾經我都有把持過的人生觀點，要走始終都要走，以前講得容易，原來用在自己身上又有另一番體會．捨不得就是情感，就算偉大的人生理論擺在眼前，感情係私人既，永遠改變唔到，嘗試懇求上帝幫助，希望真的有奇蹟出現．

難過的一周

11月21日,早上阿媽收到醫院電話話老豆病情轉差,那時的我還未估計"差"的意思,本來兩日前還見老豆有講有笑,只不過要不停洗血,誰不知兩日後醫生接見我,話老豆嚴重細菌感染,出現連串併發症,最要命的一句就是隨時有生命危險,比入院那天的打擊還要大好幾倍,幾乎完全不能接受這個事實.阿媽聽到消息已經哭聲淚下，大家都不能接受這彷如一下推落深谷的事實，由下午至晚上，陸續見到多位親戚上前探望，而我自己亦嘗試收拾心情，同自己講要有一定心理準備．
11月22日,請假,再次接見醫生,雖然說話一樣,但阿媽聽到之後明顯比之前定神,我亦要開始做定準備工作,包括要將老豆大半生賺既錢過向阿媽戶口,清楚理解家庭財務狀況,詢問有關保險賠償,我連傷心時間也沒有就要看過老豆呢廿幾年來為個家做過的事.感覺好難受,一下接受現實已經困難,還要管理一切事務,再要向親友代媽講說話,對人對事為家為老豆,我累了．
11月23日,需要返公司工作,早上公司只有我一人,那一刻我不需要面對阿媽或任何人,我呼出心裡一啖氣,就開始想起老豆,好掛住老豆,好想老豆冇事,一家人開開心心過活,我終於忍唔住喊左出黎,聲淚俱下,收唔到聲.....
11月24日見到昏睡中老豆面色比早幾日好,但醫生話老豆仍然處於危險階段,阿媽見到老豆面色好左已經安心,相對我來說,只要一日醫生未跟我講老豆有好轉跡象,我不敢安心,相當矛盾的心情,要自己不斷走向現實不能安慰自己,隨時要接受再一次的打擊,日子非常難過.

過後

老豆出事至今已經有一星期多，仍然要係深切接受洗血，我每日收工就要趕上屯門醫院探佢，就算距離探病時間只有五分鐘都要趕上去，每次見面老豆都要講句聽日唔好黎啦，到聽日我咪又係佢面前出現．住係醫院不見天日，那種寂寞相比之下更難受，探望亦係我唯一可以做到既事，只不過係佢面前，我依然顯得無助．
家，打從出事一日我已準備承擔，儘管我肩膀不夠力，不夠寬，我都要繼續．打算，當然有想過，日日都會想，只可惜時間拖慢我打算，未見個步要行都要等．心情，好複雜，對人對事都要不同心情對待，慢慢失去自我，有時連自己都不知想點．辛苦，依家行得走得係我，瞓係病床係老豆，盡量都不會同自己講辛苦．
好多謝朋友支持，至少心亂如麻時候總可以找人吹水，就算身邊未有伴侶支持，我都仍然撐得住．

轉捩點

我相信人生總有好幾個轉捩點，能夠一生順風順水也不是好事，多幾個難關要闖也不見得壞．
11月10日,不分日夜趕工完成動畫,我敢話自己未有如此集中做好一件事,曾經年頭許下承諾誓要做到,係覺得是時候為自己事業生涯添多一點顏色定還是證明自己也有努力過就不得而知.
將要遞交作品一刻,收到細佬電話,得知老豆入左醫院,證實係血糖過高上腦.
將近呼出那啖氣又要吸番,我個腦即時諗左好多好多野,做左好多打算,或者我份人就係咁,鐘意將事情諗到最壞好讓自己好過一點.
去到醫院一刻,我見我姑媽滿有淚光,媽咪坐在走廊一角,阿媽將之前電話中交代既事因一五一十重覆講俾我聽,當時我真冇預見情況去到咁壞.
直至入去見我老豆,全身俾人挷起,滿口不斷要求我放他走,又說好辛苦,我知道個時佢已經唔認得我,明知聽唔入耳的說話都要講晒出黎,好難受,返出去之前,我跟細佬一齊洗手消毒,見他已經忍唔住想喊,我眼淚早已經流下來,回想起我已經好幾年冇大灑淚水,出黎我淨係識同媽咪講,老豆好辛苦....